На Петрыкаўшчыне працягваецца ўшанаванне лепшых працаўнікоў па выніках Рэспубліканскай 
прафсаюзнай акцыі“Наш жывёлавод”.

 Старшыня Петрыкаўскага раённага аб’яднання арганізацый прафсаюзаў Федэрацыі прафсаюзаў Галіна
Шчэрбак,галоўны бухгалтар Петрыкаўскай раённай арганізацыі прафсаюза работнікаў АПК АленаГаленя  наведалі ААТ“Курыцічы”,каб сказаць словы падзякі мясцовым жывёлаводам за адказныя адносіны да   працы і ўручыць каштоўныя падарункі.

Першай сярод курыціцкіх жывёлаводаў атрымала заслужаную ўзнагароду Алена Ярыга, цялятніца малочна-таварнага комплексу “Курыцічы”. Працуе жанчына ў сельгасвытворчасці дванаццаць гадоў. Пасля заканчэння мясцовай школы, у адным з гомельскіх вучылішч набыла спецыяльнасць швачкі і пэўны час працавала на Мазырскай швейнай фабрыцы. Лёс распарадзіўся так, што вярнулася жыць на бацькаўшчыну, бо выйшла замуж за мясцовага юнака, які на той час працаваў у гаспадарцы.  Пра рашэнне пайсці працаваць на ферму Алена Міхайлаўна не пашкадавала. Гаспадарка выдзяліла дом, праз пэўны час у маладой сям’і нарадзіліся дзве дачушкі.  Адным  словам – абжыліся на малой радзіме. Жанчына прызнаецца, што да фізічнай працы яна прывычная, з дзяцінства ведае асаблівасці вясковай працы: маці працавала даяркай, бацька – слесарам. – У працу жывёлавода ўцягнулася і ведаю яе дасканала. У мае абавязкі ўваходзіць догляд цялятак да 2 месяцаў. Іх у мяне больш за пяцьдзясят, – дзеліцца  гераіня. – Даглядаю іх з любоўю і клопатам, пры гэтым не забываю і пра тэхналагічныя патрабаванні.

        Дарэчы, у працаўніцы прывес кожнай жывёліны складае каля 910 грамаў у дзень, што даказвае клапатлівыя адносіны маёй гераіні да сваіх падапечных. Са слоў суразмоўцы, калі адносіцца да сваёй справы адказна – вынік не заставіць сябе чакаць.       

       Наступны аб’ект наведвання – малочна-таварная ферма “Лосевічы”. Тут трыццаць гадоў працуе аператарам машыннага даення яшчэ адна гераіня прафсаюзнай акцыі – Лілія Амельчанка. І ўявіце – з адным запісам у працоўнай  кніжцы. Як і першая гераіня, Лілія Аляксандраўна  мясцовая. Скончыла Курыціцкую сярэднюю школу, у роднай старонцы знайшла сваё жаночае шчасце. Куды працаўладкавацца пытанне не стаяла – пайшла па слядах бацькоў, якія працавалі жывёлаводамі. Пры падтрымцы дзяржавы, гаспадарка выдзяліла маладым сяльгаснікам дом. З гадамі сям’я набыла статус шматдзетнай. Трое дачок гераіні ўжо дарослыя і падаравалі ёй дваіх унукаў.

– На ферме працаваць нялёгка, але камусьці і гэтую работу неабходна выконваць, – гаворыць даярка. – Я адданая сваёй прафесіі і раблю яе сумленна.

У Ліліі Аляксандраўны на абслугоўванні шэсцьдзясят кароў. Дзякуючы яе стараннасці і адказнасці, паказчыкі па надоі малака 700 літраў у суткі можна лічыць прыкладам.

        Суразмоўца лічыць, што жыхарам сельскай мясцовасці без хатняй гаспадаркі нікуды. Таму доўгі час трымала на асабістым падворку коз, па некалькі кароў, свіней. Трымае і зараз гаспадарку, але меншую. І на працы, і дома, дзякуючы яе руплівасці, жывёліна заўсёды дагледжаная.

       Падчас сустрэчы з працаўніцамі  старшыня Петрыкаўскага раённага аб’яднання арганізацый прафсаюзаў Галіна Шчэрбак адзначыла, што жывёлагадоўля – бадай самы адказны напрамак у аграпрамысловасці. Згодна з праграмай развіцця краіны, менавіта вытворчасці малака і мяса надаецца асаблівая ўвага. Галіна Валянцінаўна адрасавала жанчынам словы падзякі і пажаданне дабрабыту. Не засталася ўбаку ад віншаванняў і лідар раённай арганізацыі прафсаюза работнікаў АПК Алена Галеня, якая адзначыла, што менавіта такія людзі, чые прозвішчы прагучалі сёння – сапраўдны прыклад чалавека працы.

Святлана СОБАЛЕВА